EMAITZEI DAGOKIONEZ, ASTEBURU KASKARRA
Garaipen bakarra lortu dute gure taldeek
UROLA EK LAZTIMENDIkoek ez ziren batere fin aritu Elgoibarren. Une oro partidatik kanpo, hotz, intentsitate gabe aritu ziren Ikerren mutilek. Bigun defentsan, erraztasunak eman zizkien etxekoei, askotan bigarren eta hirugarren aukerak emanez. Erasoan ere kamuts, asmatu ezinik eta jaurtiketa asko hutseginez. Hori gutxi balitz, beroketa garaian Kerman ondoezik sentitu eta oso gutxi jokatu ahal izan zuen, eta Maniegak lehen zatian, kolpe txar baten ondorioz, aulkian izan zen tarte handi batean. Taldean jokalari gutxi daudela kantuan izanik, hutsuneak nabaritu ziren eta gainontzeko jokalariak hartu behar izan zuten erantzunkizuna. Azkenean gaitz erdi, gol bakar batez bada ere (26-27), garaipena hori-urdinentzat izan bai zen.
Infantil mailako mutilak multzoko liderraren aurka belaunikatu behar izan zuten (24-38) igandean Ispillan. Morandarrak entrenatutako mutilek urduri kantxaratu ziren, aurreko asteburuan erakutsitako grinarik gabe, intentsitate gutxirekin arituz eta armaginak baino gutxiago izan ziren partidan zehar. Eibartarrak erraztasunak baliatu eta, joko azkarra eginez, garaipena poltsikoratu eta era berean multzoko lehen postua ziurtatu zuten, Liga amaitzeko jardunaldi baten faltan. Zorionak.
Igandean ere Klubeko gazteenak aritu ziren, hauek ere Ispillan multzoko liderraren aurka eta hauek ere galtzaile suertatu ziren Elgoibarko Sanloren aurka jokatutako norgehiagokan. Bisitariak handiago eta indartsuagoak ziruditen, baina Arkaitzek eta Julenek entrenatutako mutilek ez ziren kikildu eta gogotsu ekin zioten lehiari. Ausart eta tarteka joko polita eginez, aurre egin zieten elgoibartarrei, batez ere hiru lehen laurdenetan. Azken laurdenean, bisitarien fisikoak eta batez ere nekeak erabakiorrak izan ziren. Azkenean 10-22, agian zigor gehiegitxo gure mutilek eginiko ahaleginarentzat.
BESTE EMAITZAK
Jubenil Gizonezkoak: UROLA EK SUPER BM, 17 – Amenabar, 19
Kadete Gizonezkoak: Soraluce Bergara, 28 - UROLA EK LUIS ANGEL ITURGINTZA, 25
Kadete Emakumezkoak: UROLA EK, 2 – Zalla Taberna Pulpo ZKE, 22
Infantil Emakumezkoak: UROLA EK GOIERRIBUS, 11 – Egia Bera Bera, 18
