DENBORALDIKO LEHEN PUNTUA SENIOR TALDEARENTZAT
Hori izan da, denen artean, asteburu honetan lorturiko puntu bakarra
UROLA EK LAZTIMENDIk denboraldiko lehen puntua lortu du Urnietan 24na berdindu ondoren. Hori-urdinak ia partida osoan aurretik izan direla kontuan izanik uzta eskasa dirudi. Aurretik izan arren, ez dute errenta handia lortzen asmatu eta azken unean etxekoak aurreratu direnean mamu zaharrak agertu badira ere, oraingoan berdinketa gordetzen asmatu dute Jonen eta Canarioren mutilek. Inflexio-puntua izango delakoan borrokan jarraitzea besterik ez da gelditzen.
Lehen urteko kadete mutilak irteera zaila zuten, Ordiziko Orkli multzoko buruan dabilen taldea delako. Markagailuak amaieran erakusten zuen 30-19koa engainagarria da, Moranek eta Maniegak entrenatutako mutilak estu hartu bai dituzte ordiziarrak, bai behintzat lehen zatian (11-7) eta bigarrengoaren hasieran. UROLA EK SUPER BMkoak hirura jarri dira eta etxekoak hutsartea eskatzea eta dena ematera behartu dituzte. Azkenean ordiziarren ahalmen fisiko eta teknikoa gure mutilen gogoari gailendu zaio. Txalotzekoa da urretxu-zumarragakoek eginiko ahalegina, azkenerako ahituta amaitu bai dute. Eutsi horri mutilak !!!
UROLA EK UGARTE HARATEGIA/IRATI KAFETEGIA taldeko neskak ere ez dute partida erraza izan asteburuan. Ispillan, sailkapeneko goi aldean dabilen Consulting Alavés hartu dute eta amaieran bi taldeen arteko maila desberdina agerian geratu da. Lehen zatian gure neskak gogor saiatu eta gasteiztarrei aurre egiteko gai izan dira, atsedenaldira 7-12 duin batez heldu direlarik. Bigarrengoa, ordea, guztiz desberdina izan da. Hori-urdinek pilatutako nekeari bisitarien esperientzia eta heldutasuna gehitu zaie eta azkenerako gureak amore eman dute (11-29). Bisitarien entrenatzaileak, emaitzek erakusten duten baino talde hobea iruditu zaiola aipatu du. Horrelako laudorioak lanean jarraitzeko akuilu dira. Gure garaia iritsiko da!!!
Bigarren urteko kadete neskak ere garaipenik lortu gabe jarraitzen dute. Teorian Bera Bera ez da arerio erraza, baina Cabrerak eta Pirizek entrenatutako neskak aurre egin eta, 11-13 galdu arren, aho-zapore onarekin amaitu dute. Unean uneko akatsak emaitza hobeagoa lortzea galarazi die, baina garaipenetik gertu egoteak hazten jarraitzeko balio behar die. Aupa neskak!!!
Gainontzeko emaitzak:
Jubenil mutilak: Aloña Mendi 27 – UROLA EK SUPER BM 25
Kadete mutilak: UROLA EK LUIS ANGEL ITURGINTZA 22 – Ereintza Beissier 28
Infantil mutilak: Tolosa 34 – UROLA EK GOIERRIBUS 7
