UROLA EK RSA EUSKAL LIGARAKO SAILKATUA
Kadete Mutilen Euskal Ligarako Igoera Faseak markatutako asteburua
Asteburu betea izan dugu Klubean. Hamabi partidu jokatu dituzte gure taldeek eta horietatik hamar -gehi Euskal Ligara igotzeko faseko hiru- Ispillan jokatzen ziren, beraz, batzuk Aldirira (Urretxu) eta Zubipera (Ormaiztegi) eraman behar izan ditugu. Guztien artean Kadete Mailako Euskal Ligara igotzeko fasekoak nabarmentzen dira. Igoera fase hau arrakastatsutzat jo daiteke, bai kirol arloan, bai antolakuntzan.
Antolakuntzan, Klubak, beste behin ere, horrelako ekitaldiak antolatzeko giharra eta gaitasuna erakutsi ahal izan ditu. Jende asko joan da Ispillara, giro ona egon da, errespetuzkoa eta adeitsua.
Kirol arloan, UROLA EK RSAk Euskal Ligarako sailkatzea lortu du. Jose Angel Garcia Vara eta Oiher Perez entrenatutakoek bi garaipen lortu dituzte hiru partidatan, bigarren postuan sailkatuz, eta horrek Euskal Liga jokatzeko eskubidea ematen die denboraldi amaierara arte. Ziur sektorean erakutsitako jokoak morala eta konfiantza ematen diela, maila horretako taldeei aurre egiteko gai direla erakutsi baitute. Bejondeizuela !!!
Orokorrean, eta nahiz eta bukaerako markagailuren batek ez islatu, fase oso lehiatua izan dugu, partida biziak, markagailuan txandakatzeak, tanteo altuak, non erasoak defentsei gailendu zaizkien eta jokalari guztiak biziki ahalegindu diren. Lerro hauen bidez, zorionak guztioi. Ohore handia izan da Ispillan hartzea eta laster elkar ikustea espero dugu.
Gainerakoan, aurreko jardunaldietan antzera. Senior mailan, lehenengo bi taldeek, bai gizonezkoek eta bai emakumezkoek, ez dute lortzen euren norabidea zuzentzea, eta gizonezkoen bigarren lurraldeko taldeak, UROLA EK CRISTALERÍA GOIERRIk, ematen digu poztasunen bat.
Jubenil mutilek, UROLA EK ANTONIO ARANZADI taldeak, Gipuzkoako Txapelketaren bigarren fasea amaitu du, meritu handiko hamargarren postua lortuz, bigarren fase honetan laugarren postuan geratuz.
Klubeko gazteenek, prestakuntza taldeek, ematen dizkigute alaitasunik handienak. Kadete nesketan UROLA EK GOIERRIBUS taldeak jokatu du bakarrik, hamazazpinako berdinketa lortuz, bere multzoko sailkapenaren lehen erdian mantentzen delarik.
Infantiletan, batean kale eta bestean bale, nesketan. UROLA EKaren porrota eta UROLA EK URZUMen garaipena. Mutiletan, berriz, UROLA EK ALAI HORTZ KLINIKAk eta UROLA EK DESKARGA AROZTEGIAk haise nagusitu dira biak, azken hauek bere multzoko bigarrenak direlarik.
