ASTEBURU ONA, SANTALUTZI AZOKAREN BUELTAN
Bai kirol arloan, bai formakuntzan
Aurretik ere esan dugu, zamarra horia janzten dugun bakoitzean gure asmoa ahalik eta lehiakorrenak izatea da, eta garaipena bilatzen dugu, baina edozein klubetan, eta gurean ere hala da, pertsonak osatu eta balioak landu beharko genituzke.
Horregatik, asteburu hau berezia izan da UROLA EKrentzat, alde batetik, emakume eta gizonen arteko berdintasunaren alde egiten dugun lanagatik sarituak izan garelako, eta, bestetik, Zumarragako Udalarekin lankidetzan aritu garelako Santalutzi eguneko lan logistikoetan, herria eginez eta boluntariotza eta erakundeen arteko lankidetza sustatuz.
Formakuntzaz ari garela, Klubeko txikienek denboraldiko hirugarren topaketa izan dute. Oraingoan Donostiara gerturatu dira eta Bera Bera izan dute anfitrioi. Bera Bera KE, Bergara KE, Leizaran EKK, Pulpo EK eta Urola Ekeko eskubaloi eskoletako haurrek Bidebietan elkartu eta kirol zoragarri honetaz gozatzeko aukera izan dute: partidak jokatu, lagunak egin, esperientzia berriak bizi…
Emaitza onak infantil mailan, lau partidatik hiru garaipen lortuta. Emakumezkoen bi taldeek, UROLA EK-k eta UROLA EK URZUM-ek garaipen bikainak lortu dituzte Urnieta KE-ri eta Zarautz KE-ri egindako bisitetan, hurrenez hurren. Mutiletan UROLA EK DESKARGA AROZTEGIA taldeak Aloña Mendi KE gainditu du, eta UROLA EK DESKARGA ALAI HORTZ KLINIKA taldeak ezin izan du Zarautz KE gainditu.
Kadeteetan, UROLA EK RSAko mutilek berriro irabazi dute eta sailkapenaren buruan jarraitzen dute. Usurbil KEren porrotak, hein batean harrigarria, lau puntuko aldea ematen dio gure taldeari Gipuzkoako Txapelketa amaitzeko hiru jardunaldiren faltan.
Nesketan, UROLA EK GOIERRI BUS taldeak garaipen erosoa lortu du Bergaran, eta UROLA EK EUTSI taldeak ezin izan du Saiekorekin, multzoko liderra, Ispillan.
UROLA EK ANTONIO ARANZADI taldeko jubenil mutilek laugarren garaipena lortu dute Gipuzkoako Txapelketako bigarren fasean (7.etik 16.era bitarteko postuak). Hiru partida geratzen zaizkie, eta sailkapenaren goialdean ondo kokatuta daude.
Emaitza kaskarrenak senior mailako taldeentzat izan dira. Emakumezkoen eta gizonezkoen lehen taldeek, UROLA EK CONSTRUCCIONES ANTIOk eta UROLA EK LAZTIMENDIk, porrota jaso dute. Bigarren Lurraldeko gizonezkoek, UROLA EK CRISTALERÍA GOIERRIk, lortu dute nagusien arteko garaipen bakarra Urnieta KE hamahiru goleko aldeaz garaituz.
* Atzeratua/Aplazado
