KADETE MUTILAK GIPUZKOAKO TXAPELDUN
Matematikoki baziren duela zenbait jardunaldietatik, baina behin txapelketa amaituta, ofizialki hala dira.
Gipuzkoako Txapelketa bikaina egin dute UROLA EK RSAko mutilek, ez baitute partidarik galdu bi faseetan, eta horrek balio izan die Gipuzkoako Txapeldun nagusitasun osoz izateko. Bejondeiela Jose Angel, Oiher eta bere mutilei !!!
Hurrengo pausoa Euskal Ligara igotzeko fasea jokatzea izango da. Fase hori datorren asteburuan jokatuko da (urtarrilaren 24, 25 eta 26an), bi multzotan banatuta. A multzoan Euskal Ligako zortzigarren sailkatua, Bizkaiko txapelduna, Gipuzkoako txapeldunordea eta hirugarren bizkaitarra egongo dira. B multzoan, berriz, Euskal Ligako zazpigarren sailkatua, Gipuzkoako txapelduna, Bizkaiko txapeldunordea eta Gipuzkoako hirugarrena.
Gipuzkoako Txapeldun izateak fasea Ispillan jokatzeko eskubidea ematen digu. Egin lekua zuen agendetan ekitaldi honi, eta adi egon; laster emango dizuegu ordutegien, parte hartuko duten taldeen eta abarren berri. AUPA UROLA EK !!!
Senior Mutilen mailan Txingudi izan da aurkari bikoitza, klub bakoitzak garaipen bana lortuz. UROLA EK LAZTEIMENDI hutsik itzuli da Irundik, eta UROLA EK CRISTALERÍA GOIHERRI taldeak garaipena lortu du Ispillan.
UROLA EK ANTONIO ARANZADI taldeak, jubenil mutilak, Donostiara bidaiatu du eta Bera Beraren aurkako norgehiagokan porrot argia jaso du. Bera Bera multzoko liderra da eta partidarik galdu gabe dago bigarren fasean.
Asteburu ona kadete neskentzat. Bi taldeak, UROLA EK EUTSI eta UROLA EK GOIERRIBUS, indartsu aritu dira Ispillan garaipen bana lortuz. Lehenengoek Gipuzkoako Txapelketako azken partida jokatu dute, eta meritu handiko seigarren postua lortu dute, bigarren fasean nabarmen hobera eginez. Zorionak Mikel, Beñat eta neska guztiei.
Infantiletan UROLA EK - Ereintza norgehiagoka hirukoitza. Hiru partidak Errenterian jokatu dira, bi garaipen, bat gol bakar baten aldeaz, etxekoentzat eta garaipen bat, UROLA EK DESKARGA AROZTEGIArena, gureentzat.
Infantil nesken beste taldeak, UROLA EK URZUMek, multzoko sailkapenaren goiko aldean mantentzen dituen garaipen argia lortu du Ispillan.
Klubeko gaztetxoenak ere jokatu dute asteburu honetan. Zelai osoan aritzen diren alebin neska-mutilak Aloña Mendiren aurka galdu dute Oñatin. Eskubaloi Eskolakoei Ispillan aritzea egokitu zaie, aspaldiko partez. Elgoibarko Sanlo eta Legazpiko La Salle izan dituzte bisitari.
