Kadete gizonezkoak liderra gainditu dute
Usurbil KEaren erronka bikain gainditu dute.
Partida ederra ikusi dugu gaur goizean Ispillan bildu garen ikusle guztiak. Gure mutilak, multzoko liderra eta orain arteko partidak era erosoan irabazi dituen Usurbil KEaren bisita jaso dute. Partida bizi eta handi baten ondoren usurbildarrak gure mutilen aurrean makurtu beharra izan dute.
Hasierako minutu berdinduen ondoren, UROLA ASPIRACIONES SANTA LUCIAko jokalariak markagailuan aurrea hartzea lortu dute eta lehenengo zatian bi-hiru goleko errentarekin aritu izan dira, atsedenaldira 22 eta 20 iritsi direlarik. Jarraipenean bisitariek, jokalari onenak zelairatuta, gauzak estu jarri dizkigute eta partida orekatzea lortu duten arren, gutxitan izan dira gure taldearen aurretik, eta izan diren unetan gol bateko aldea besterik ez dute izan. Gure mutilek, hordagoari aurre egin eta une oro aurpegia emanez, une latz horietatik ongi irten dira eta markagailuan berriro aurretik jartzea lortu dute. Azken minutuak oso biziak izan dira, garaipena edozeinen eskuetara joan zitekeen, baina gure mutilek urduritasuna eta presioa ongi eramaten asmatu dute eta azkenik 38 eta 37ko emaitzaz garaipen handia lortu dute.
Liderraren aurrean lortutako lehenengo garaipen honek, orain arte bi berdinketa lortuak zituzten, gure mutilen animuak altxa eta indarrak eman behar dizkie, joko maila eta intentsitatea mantenduz, garaipen gehiago poltsikoratzeko.
